කලාපේ ලියුම

මාසෙ අන්තිම
පඩිය අරගෙන
ගෙදර යන්නේ
කවදද

ඇඟිලි ගනිමින්
බලං ඉන්නේ
අම්මෙ නුඹෙ රුව 
දකින්ට

නංගිගේ 
ඉගෙනුමට
අම්මගෙ බේත් ටික
අරගන්නට

ලබන සතියේ
එනවා අම්මේ
රහට හදපං
කන්නට


ජුකී ඕලොක්
මැසින් අතරේ
ගෙවිලා යන මේ
ජීවිතේ

ලෙඩ නිවාඩුත් 
නැතුව මැසිමට
කඳුලේ බර දෙන
වෙලාවේ

ටාගට් ඔපිසර්ගේ
බැනුමෙන් 
දෙකන් පිරෙනා
හැමවෙලේ

සැනසුමක් මගේ
හිත තෙමන්නේ
සිහිවුනාමයි 
නුඹගේ සෙනේ

බෝඩිමේ අපෙ
දහ දෙනෙක් එක
කාමරේකට 
ඉන්නවා

පස් දෙනෙක් රෑ 
වැඩකරනකොට
පස් දෙනෙක් නිදි
ගන්නවා

කෑම බීමත් 
මාසේ දවසට
අපි බෙදාගෙන 
හදනවා

රජ බොජුන් වගේ
ලූණු සම්බල්
බත් එක්ක අපි
හදනවා

කඩේ අයියා 
ෂේප් හින්දා
ණයට බඩු ටික
ගන්නවා

ඒ උනත් ඒ
මිනිහගේ ඇස්
හොරෙන් රහසක්
කියනවා

චතූ ගේ අම්මගේ
සැත්කම 
තිබුණ හින්දා
ගිය මාසේ

බෝඩිමේ පන්දාහ
ගෙව්වේ
නමදෙනා අපි
එක්වෙලා

කෙල්ලො සෙට් එක
ඒ නිසාමද 
මන්දා දැන්
විරසක වෙලා

පොතේ ණය ටික
බේරගන්නට
සල්ලි දෙන්නෑ
නෑ කියා

සල්ලි වැඩිපුර
හම්බ කරනට
පාට් ටයිමුත්
තියෙනවා

ෂිෆ්ට් එක උදේ
කවර් කරලා
රෑට ඒවට
දුවනවා

කස්ටමර්ලට 
කැමති විදිහට
කෙල්ලො ඒ වැඩ
කරනවා

මාසේ අන්තිම 
අපි හොයනවාගේ
දෙගුණයක් උන්
හොයනවා

සිරුරෙ උකසින් 
සල්ලි හොයලා
අපා දුක් උන්
විඳිනවා

මෝටර් සයිකල්
කොල්ලොනම්
මෙහෙ එමට අම්මේ
ඉන්නවා

බෝඩිමට වැඩ
ඇරිලා එනකොට
මගත් රැකගෙන
ඉන්නවා

ආදරෙයි මයෙ 
නංගි කියලා
සුරතලෙන් බස්
දොඩනවා

අම්මගේ අවවාද
තාමත් 
මගේ හිත තුල
තියෙනවා

අවුරුද්දත් ලඟයි 
වාගේ
කොහා ඒ බව
කියනවා

බෝනසුත් දැං 
ලැබෙයි අම්මේ
හිතේ සතුටක් 
තියෙනවා

අම්මටයි නංගිටයි
ඇඳුමුත් අරං 
මං ඔහෙ
ආවම

වහලේ ටකරං
හෙවිලි කරමු
දැංම මාමට
කියන්න

හිතේ හැටියට 
අම්මගේ 
තුරුලට වෙලා
දොයියන්නට

අම්මේ ලොකු දූ
එනවා එතකං
සමිඳු සරණයි
ඔබලට

- නාචි -

Photo credit goes to original photographer.