පේමන්ට් එකේ කතාවක්

ගිනි කාස්ටක අව්ව
හම පුපුරු ගස්සාන
ඇට මිදුළු දක්වාම
රත්කරං යනවිටදි

ඉස්පිරිතාලෙට කිට්ටු
නිල්වලාවට උඩින්
යන පාලම දූලි
වැසිවලින් නෑවෙද්දි



පාලම උඩින් යන
වෛවාරණ ඇඳුම්
ඇඳගත්ත පිංවතුන්
ගැන ගැනයි මං උන්නෙ

රුපියලක් ගානේ එක
පිංවතෙක් දුන්නොතිං
කලෙක්ෂන් එකෙ ගාන
හද හදයි මං හිටියෙ

ගිය සතියෙ ලොක්කගෙන්
කෑවේ කණ පුපුරන්න
කලෙක්ෂන් එක මදියි
කියලායි ඒ සතියේ

මේ සතියෙ කලෙක්ෂන්
සරුසාර කරගන්න
කකුල් දෙක නැතිවෙච්චි
විදිහටයි මං ඉන්නෙ

ගිය මාසෙ මුල් සතියෙ
තව අලුත් සෙට් එකක්
ලොක්කා එක්කං ආවේ
බස් වලට නග්ගන්න

පාර අයිනේ ඉන්න
අපිට වාගේ නොවෙයි
බස්වලට නැග්ගාම 
උන්ටනං හම්බෙන්නෙ

මාසෙ මුල අපිට දෙන
බජට් එක කවර් කර
ගන්න අපි හැමදාම
උන්ගෙන් උදව් ගන්නෙ

අලුතින්ම ජොබ් එකට
ආව සෙට් එක අතරෙ
ගැබිණි අම්මෙක් හිටියා
අම්පාර ගම වෙච්චි

මිනිහා දාලා ගිහිං
තව පුතෙක් ඉන්නවලු
මාස දෙකකට වරක්
ගම පැත්තෙ යනවාලු

සොච්චමෙන් හම්බෙන
ලොක්කගෙන් මාසෙකට
පොඩි එකා සනසන්න
බඩුත් ගෙන යනවාලු

බස්වලට නැග්ගාම
දුක ටිකක් කිව්වාම
පිං කැමති ඇත්තන්ට
දුක ටිකක් දැනුනාම

කලෙක්ෂන් එක සරුයි
ලොක්කටත් හරි හැපියි
ගුටි නොකා බේරෙන්න
ඒක හොඳටම ඇතියි

ඒ උනත් මට අයිති
පේමන්ට් එක තමයි
පිං කැමති ඇත්තොනං
මේ හරියෙ හරි අඩුයි

හවස හය පහුවෙලා
ටිකක් ගත වෙලා යද්දි
පිට්ටනියෙ කෙලවරට
හෙමි හෙමින් අපි යනවා

කකුල් දෙක තිබෙන මුත්
නැති වගේ පෙන්නාලා
ඒ යන අතරෙදිත්
කලෙක්ෂන් හොයනවා

අඳුර ටික ටික එද්දි
ලොක්කාගෙ සුදු පාට
වැගන් එක පැමිණෙන්නෙ
අපිව එක්කං යන්න

පොඩි එවුං අට දෙනයි
අන්ධයන් තුන් දෙනයි
කොර එවුන් පස් දෙනයි
ගැබිණි අම්මයි මමයි

සේරමලා දහ අටයි
ටවුන් එකටම ඇතියි
ටවුමේ මුලු කලෙක්ෂන්
එක ලොක්කගෙ තමයි

අදත් මං බජට් එක
කවර් නොකරපු හින්දා
ලොක්කගෙං අදත් ගුටි 
පූජාව සුවර් ෂොට්

ඇලියොන් එකේ දොර
බාගෙකට ඇරන් පොර
බ්ලැක් ලේබල් එකක්
හෙමිං හිස් කරනවා

ඒ අතරෙ අපේ අද
කලෙක්ෂන් එක සරුද
කියා බලනට අපේ
මලුත් චෙක් කරනවා

ඊලඟට මගේ මල්ල
අදත් ගුටි කාගෙනම
හෙටත් උදයේම මං
කලෙක්ෂන් හොයනවා.

- නාචි -

Photo credits goes to original photograpger.